ལྷ་རམས་པ་དགེ་བཤེས་ངག་དབང་མཆོག་ལྡན་གྱིས་བརྩམས།

                     ཤར་སྨར་ཁམས་གླིང་དུ་སྐྱེ་བ་བཞེས། །
                     ནུབ་འཕགས་པའི་ཡུལ་ནས་ཡོན་ཏན་རྒྱས། །
                     ལྷོ་འཛམ་བུ་གླིང་གི་ཡུལ་གྲུ་ཀུན། །
                     མགོན་གངས་རི་ཀརྨས་འགྲོ་དོན་མཛད། །

                   བདུད་སོག་དམག་གོ་ཤྲི་རྒྱལ་པོ་ཡིས། །
                   སྨར་ཤོ་ཙོམ་གདན་ས་རྣམ་གཉིས་ཀྱི། །
                   དགོན་ཁྲི་སྟོང་མང་པོ་གཏོར་ན་ཡང་། །
                   ནང་བསྟན་པའི་སྙིང་པོ་མ་ཉམས་བཞུགས། །

                   རྗེ་སྨར་པའི་ཕྱག་ཆེ་བསྟན་པ་འདི། །

                   རྗེ་གྲུབ་ཐོབ་གོང་མའི་ལུང་བསྟན་ལྟར། །
                    རྗེ་འགྲོ་མགོན་རིན་ཆེ་སླར་བྱོན་པའི། །
                    
                    རྗེ་གངས་རི་ཀརྨས་སླར་གསོ་མཛད། །
ཞེས་བསྟོད་ཚིག་གི་མེ་ཏོག་སྔོན་དུ་འཐོར་ནས་སྐབས་འདིར་གླེང་བར་བྱ་བ་ནི་སྨར་ཁམས་ཁྲ་མོ་གླིང་གི་ཡུལ་དུ། སྨར་ཚང་བཀའ་བརྒྱུད་ཀྱི་བསྟན་པ་ས་ཁྱབ་རྡོ་དར་དུ་གྱུར་ནས་འགྲོ་བ་མང་པོར་ཐར་པའི་ལམ་སྟོན་བྱས་པའི་ཕྱག་རྗེས་ནི་བསུབ་ཀྱང་ཟུབ་ཏུ་མེད། འོན་ཀྱང་རྐྱེན་ངན་སྣ་ཚོགས་དབང་གིས་རིམ་བཞིན་བསྟན་པའི་ཉི་མ་ནུབ་ཀྱི་རི་བོའི་ཕྲག་ནས་བཞུད་དགོས་འཁེལ་ཡང། དུས་གསུམ་ལ་མཁྱེན་པའི་གྲུབ་ཐོབ་མང་པོས་སྨར་པའི་བསྟན་པ་སླར་ཡང་གསོ་བའི་དུས་འོང་བར་ཡང་ནས་ཡང་དུ་ལུང་བསྟན་པ་ལྟར། ཤར་སྨར་ཁམས་གླིང་གི་ས་ཆ་ན་དུས་རབས་ཉི་ཤུ་པའི་ནང་དུ་སྐུ་འཁྲུངས་ཤིང་། ལོ་རབས་བརྒྱད་བཅུ་པ་ནས་ནུབ་འཕགས་པའི་ཡུལ་དུ་ཐུགས་ཀྱི་ཡོན་ཏན་རྒྱས་པར་བྱས།  དུས་རབས་ཉེར་གཅིག་པའི་ནང་འཛམ་གླིང་ཤར་ལྷོའི་ཡུལ་གྲུ་ཀུན་ན་གསུང་གི་མཛད་འཕྲིན་སྨིན་པའི་ལེའུ་ལས་ཟེའུ་འབྲུ་ཙམ་ཞིག་བླངས་ནས་བརྗོད་ན། དེ་ཡང་སྟོབས་ཆེན་དབྱིན་ཇིའི་རྒྱལ་ཁབ་དུ་སྨར་ཚང་བཀའ་བརྒྱུད་རྟག་བརྟན་ཕུན་ཚོགས་གླིང་ཕྱག་བཏབ་ནས་མི་ལོ་བཅུ་ཕྲུག་ལྷག་གི་རིང་ལ།  དཀའ་ངལ་འཛེམ་མེད་ཀྱི་སྒོ་ནས་སྨར་ཚང་ལམ་རིམ་ཆེན་མོ་དང་། སྨར་ཚང་ཕྱག་ཆེན་སོགས་ནང་པའི་ལྟ་གྲུབ་དང་རིག་གཞུང་འཆད་ཁྲིད་རྒྱུན་སྐྱོང་གནང་བས། འགྲོ་བ་མང་པོ་ཞིག་སེམས་ཁམས་ལ་འགྱུར་བ་འཐད་ཐུབ་པར་གྱུར། ལྷག་པར་དུ་གཏོ་དབྱིབས་ནད་དུག་གི་རྐྱེན་པས་འཛམ་གླིང་ཧྲིལ་པོ་ཆེས་མུན་ནག་གི་ནང་དུ་ལྷུང་ནས་སེམས་ལ་འཇིགས་སྣང་དང་། སྐྱོ་སྣང་། ངལ་དུག་གི་ཁེངས་པའི་དུས་སུ། འགྲོ་མགོན་མཆོག་གིས་སྐད་རིགས་གསུམ་གྱི་སློབ་དགེ་བཙུགས་ནས་ལོ་ངོ་ཧྲིལ་པོ་གཉིས་ལ་སྒོམ་ཁྲིད་རྒྱུན་བསྐྱངས་པས། ཆོས་ཡོད་སྨྲ་བ་དང་ཆོས་མེད་སྨྲ་བའི་འགྲོ་བ་མང་པོ་ཞིག་བཟོད་དཀའ་བའི་འཇིགས་སྣང་ལས་སྐྱོབས་པའི་རླབས་ཆེན་གྱི་ནུས་པ་ཐོན། འཛམ་གླིང་ས་ཡི་སུམ་གཉིས་དབང་དུ་བསྒྱུར་བའི་དབྱིན་ཇི་རྒྱལ་པོའི་རྒྱུད་འཛིན་པ། རྒྱལ་པོ་ཕྱྭ་ལི་སི་ཡིས་རྟེན་བཞེངས་བྱས་པའི་ཆོས་ལུགས་དད་མོས་ཀྱི་རང་དབང་ཞེས་པའི་ཚོགས་པ་དེ་ཉིད་ཀྱིས། དབྱིན་ཇིའི་རྒྱལ་ཁབ་ཏུ་གཞུང་འབྲེལ་གྱི་དེབ་སྐྱེལ་བྱས་པའི་ཡེ་ཤུ། ཧིན་དུ། འཇི་ཤུ། པག་ཇམ། ཁ་ཆེ། བོད་ཆོས། རྒྱ་ཆོས། ཐེག་དམན་སོགས་ཆོས་ཚོགས་བཞི་ཁྲི་དགུ་སྟོང་བརྒྱད་བརྒྱ་བརྒྱ་ཅུ་གྱ་གཅིག་དང་། རྒྱལ་ས་ལོ་ཊོན་དུ་ཆོས་ཚོགས་གཉིས་སྟོང་གཉིས་བརྒྱ་ཡོད་པ་རྣམས་ཀྱིས་ཡུལ་འདི་འགྲོ་བ་མི་དམངས་ལ་ཕན་ནུས་གཟེངས་སུ་ཐོན་པའི་ཆོས་ཚོགས་སུམ་ཅུ་སོ་གཉིས་འདེམ་སྒྲུག་བྱས་ནས། ཕྱི་ལོ་༢༠༢༣ ཕྱི་ཟླ་བ་༡༡་ཚེས་༢༡ ལ་གཟེངས་རྟགས་ཐེངས་བདུན་པ་འབུལ་གཏན་ཁེལ་ནས་ཉམས་ཞིབ་བྱས་པའི་ཁྲོད་དུ། ནང་པའི་ཆོས་ཚོགས་ནང་ནས་སྨར་ཚང་བཀའ་བརྒྱུད་རྟག་བརྟན་ཕུན་ཚོགས་གླིང་གཅིག་པུ་བདམས་ཐོན་བྱུང་ཞིང་། དེ་ཡང་ཆོས་ཚོགས་སུམ་ཅུ་སོ་གཉིས་ཀྱི་ནང་ཚན་དུ་སྨར་ཚང་བཀའ་བརྒྱུད་ཨང་རིམ་གསུམ་པ་ལ་འདེམ་སྒྲུབ་བྱས་པ་འདི། སྤྱིར་ནང་པ་སངས་རྒྱས་པ་དང། བྱེ་བྲག་ཏུ་བོད་བརྒྱུད་ནང་བསྟན། སྒོས་སུ་སྨར་ཁམས་ཁྲ་མོ་གླིང་གི་གཟི་བརྗིད་དང་། ཡང་སྒོས་སྨར་ཚང་བཀའ་བརྒྱུད་ཀྱི་གཟི་བརྗིད་ལུས་ཡིན། གཟེངས་རྟགས་འདི་ནི་རྨོངས་དད་ཀྱི་ལམ་ནས་ཕུལ་བ་མ་ཡིན་པ། ཉམས་ཞིབ་པ་དག་གིས་གཟུར་བོ་གནས་པའི་དྲང་ཐིངས་བཏབ་ནས་ཐོབ་པའི་གཟེངས་རྟགས་ཤིག་ཡིན།  མི་རིགས་མི་གཅིག་པའི་ཚོགས་བཅར་བ་རྣམས་ཀྱི་ལུས་ཀྱི་གུས་བཀུར་མཚོན་ཕྱིར་སྐྲ་ལོ་གསེར་དང་འདྲ་བའི་མགོ་བོ་ཐུར་དུ་གུས། ངག་གི་གུས་བཀུར་མཚོན་ཕྱིར་ཕྱག་གཉིས་ཐལ་མོའི་རྡེབ་སྒྲ་སྒྲོག། སེམས་ཀྱི་གུས་བཀུར་མཚོན་ཕྱིར་དགའ་བའི་འཛུམ་མདངས་མངོན་ནས་ཡར་ལ་བཞེངས། དེ་ཡང་གནའ་མི་བོད་ཀྱི་གཏམ་དཔེ་ལ། བུ་ཕས་བསྟོད་མི་དགོས་དགྲ་ཡིས་བསྟོད། བུ་མོ་མས་བསྟོད་མི་དགོས་གཉེན་གྱིས་བསྟོད། ཅེས་པ་ལྟར་བུའོ། འགྲོ་མགོན་གངས་རི་ཀརྨ་པས་མི་ལོ་བཅུ་ཕྲག་གཅིག་ལྷག་གི་རིང་། སྨར་ཚང་ཉམས་གསོ་བྱེད་པའི་དུས་དེར་ཕྱི་ནང་གི་འགལ་རྐྱེན་མང་པོ་ཞིག་འཕྲད་ཡོད་ཀྱང་། རིན་པོ་ཆེ་མཆོག་གི་སྙིང་སྟོབས་དང་རྣམ་དཔྱོད་ལ་རྟེན་ནས་ཕལ་རྒོལ་ཐ་དག་འཇོམས་པ་བྱེད་པའི་དན་རྟགས་སུ་ཐོབ་པའི་གཟེངས་བསྟོད་ཞིག་ཀྱང་ཡིན། སྨར་ཚང་བསྟན་པའི་འོད་སྣང་ནུབ་ཕྱོགས་སུ་འཕྲོ་བའི་ལོ་རྒྱུས་པདྨ་དཀར་པོ་ལས་ཟེའུ་འབྲུ་ཙམ་ཞིག་བསླངས་ཏེ། ལྷ་རམས་པ་ངག་དབང་མཆོག་ལྡན་གྱིས་འཚངས་འདྲིའི་ཚུལ་དུ་བྲིས་ནས་ཕྱི་ལོ་༢༠༢༣་ཕྱི་ཟླ་༡༡་ཚེས་༢༣་ལ་ཕུལ། །བཀྲ་ཤིས་པར་འགྱུར་ཅིག །