འགྲོ་མགོན་གངས་རི་ཀརྨ་རིན་པོ་ཆེ་ནི་ཕྱི་ལོ་༡༩༦༤་ཟླ་བ་༦་ཚེས་༡༥་ལ་སྨར་སྟོད་ཁྱུང་འབུམ་དུ་གྲོང་སྟག་ཚང་ཡབ་པདྨ་རྒྱ་མཚོ་དང་ཡུམ་ཨ་འཛོམས་ལྷ་མོ་གཉིས་ཀྱི་སྲས་སུ་སྐུ་འཁྲུངས། བྱིས་དུས་ནས་འགྲོ་མགོན་གངས་རི་ཀརྨ་ལེགས་བཤད་རྒྱ་མཚོའི་རི་ཁྲོད་དང་། གཡའ་རྡོའི་སྒྲུབ་ཁང་། ལྷུང་བཟེད། རྫ་མའི་སྣོད། སྒྲུབ་ཆུ་སོགས་སྔོན་གནས་རྗེས་དྲན་གྱིས་ངོས་འཛིན་མཛད། དགུང་གྲངས་བརྒྱད་སོན་དུས་གོང་མའི་སློབ་མ་ཨ་རྟོགས་ཆོས་གྲགས་ལས་བོད་ཡིག་འབྲི་ཀློག་སྦྱངས་ནས་མི་རིང་བ་ཨ་རྟོགས་བདེ་བར་གཤེགས། ཕྱི་ལོ་༡༩༨༠་ལོ་སྲིད་ཇུས་གོ་ཡངས་ཐོན་པ་དང་རྒྱལ་བདག་རིན་པོ་ཆེ་དང་གུཎ་མཁན་པོའི་ཚུལ་རྒྱལ་གཉིས་ཀྱིས་འགྲོ་མགོན་གངས་རི་ཀརྨའི་ཡང་སྲིད་ངོས་འཛིན་གནང། རྙིང་མ་པ་དགེ་ཉི་མ་ལས་བོད་ཡིག་འབྲི་ཀློག་དང་མི་ལ་རས་པའི་རྣམ་ཐར་སྦྱངས། ཕྱི་ལོ་༡༩༨༡་བོད་ཀྱི་དགའ་ལྡན་དགོན་པའི་ཆོས་སྒོར་ཞུགས་ནས་རབ་ཏུ་བྱུང་།
དུས་གསུམ་རྒྱལ་བའི་ཡུམ་མཆོག་བཅོམ་ལྡན་མ། །འཆི་མེད་ལྷ་མོའི་གཟུགས་ཀྱི་སྐུར་བཞེངས་པ། །
འཇིགས་རུང་འཁོར་བ་ལས་སྒྲོལ་ཏ་རེ་མས། །འཆི་མེད་ཚེ་ཡི་དངོས་གྲུབ་དེང་འདིར་སྩོལ། །
ཨོཾ་སྭ་སྟི། །མཆོག་ཏུ་མི་འགྱུར་ཡེ་ཤེས་ཚེ་མཐར་ཡས། །རྣམ་མང་སྒྱུ་འཕྲུལ་འཕགས་མ་བི་ཛ་ཡ། །
རྒྱལ་ཀུན་ཡུམ་གྱུར་ཨྰརྱ་ཏྰ་རེ་མ། །རྣམ་གསུམ་འཆི་མེད་ཚེ་ལྷས་དགེ་ལེགས་སྩོལ། །
འདི་གངས་རི་ཀརྨའི་སྐྱེ་རབས་བཅུ་གཉིས་ཀྱི་ལོ་རྒྱུས་ཕྱོགས་བསྒྲིག་ཅིག་རྗེས་སུ་འགོད་རྒྱུ་ཡིན