སྨར་ཚང་བཀའ་བརྒྱུད་ཀྱིས་དབྱིན་ཇི་དང་ཐེ་ཝན་ལ་ལོ་རྟག་ཆོས་ཕྱོགས་ཀྱི་བྱེད་སྒོ་གཏན་ཁེལ་བའི་རིགས་རྣམས་བཤམ་དུ་ངོ་སྤྲོད་མདོར་བསྡུས་ཞུ་ཡོད་པས་གཟིགས་རོགས། གལ་ཏེ་དོག་འདྲི་དགོས་ངེས་མཐོང་ཚེ་ཁ་བྱང་ཐོག་འབྲེལ་གཏུགས་གནང་རོགས། །
Read more ...སྨར་ཚང་བཀའ་བརྒྱུད་ཀྱིས་དབྱིན་ཇི་དང་ཐེ་ཝན་ལ་ལོ་རྟག་ཆོས་ཕྱོགས་ཀྱི་བྱེད་སྒོ་གཏན་ཁེལ་བའི་རིགས་རྣམས་བཤམ་དུ་ངོ་སྤྲོད་མདོར་བསྡུས་ཞུ་ཡོད་པས་གཟིགས་རོགས། གལ་ཏེ་དོག་འདྲི་དགོས་ངེས་མཐོང་ཚེ་ཁ་བྱང་ཐོག་འབྲེལ་གཏུགས་གནང་རོགས། །
Read more ...
ཆོས་ལུགས་ཀྱི་ཐོབ་ཐང་འདྲ་མཉམ་ལོངས་སྤྱོད་པའི་དབྱིན་ཇིའི་རྒྱལ་ཁབ་འདི་ལ། ཡེ་ཤུ་དང་། ཧེ་ཏུང་། ཁ་ཆེ། ནང་པ་སོགས་གཞུང་འབྲེལ་དེབ་སྐྱེལ་བྱས་པའི་ཆོས་ཚོགས་༤༩༨༨༡ ཡོད་ཅིང་། རྒྱལ་ས་ལོན་གྲོན་ལ་ཆོས་ཚོགས་༢༢༠༠ ཡོད་པ་རེད། དབྱིན་ཇིའི་རྒྱལ་་པོ་ King Charles ཕྱྭ་ལི་སི་ཡིས་བཙུགས་པའི་the Faith &Belief Forum ཞེས་པའི་ལུགས་ཀྱི་གཟེངས་རྟགས་ཚོགས་པ་འདིས། ཕྱི་ལོ་༢༠༢༣ ལོ་ཟླ་བ་༡༡ ཚེས་༢༡ ལ་གཟེངས་རྟགས་ཐེངས་བདུན་པ་འདི་ཆོས་ཚོགས་༣༢ འདེམ་སྒྲུག་བྱས་པ་ནང་ལ། སྨར་ཚང་བཀའ་བརྒྱུད་རྟག་བརྟན་ཕུན་ཚོགས་གླིང་ཡང་འདེམ་སྒྲུག་བྱས་ཡོད་གསུངས་སོང། གཟེངས་རྟགས་འདི་ཆོས་ལུགས་སོ་སོའི་ལྟ་གྲུབ་དང་། རིགས་གཞུང་། གོམས་སྲོལ་སོགས་ཐབས་སྣ་ཚོགས་ལ་བརྟེན་ནས་ཡུལ་འདི་མི་རྣམས་ལ་ཕན་པའི་ལས་དོན་གྱི་གྲུབ་འབྲས་གཟེངས་སུ་ཐོན་པའི་དཔང་རྟགས་ཕུལ་བ་ཡིན་ཞེས་འགྲེལ་བརྗོད་གནང་། སྨར་ཚང་བཀའ་བརྒྱུད་ལ་གཟེངས་རྟགས་ཕུལ་བ་འདི་མདོར་བསྡུས་ན་གཉིས་སུ་ངེས་ཡོད། དང་པོ་ནི། ཡུལ་འདིར་ནང་པ་སངས་རྒྱས་པའི་ཆོས་ཀྱི་སྲོལ་བརྒྱུད་རྙིང་མའི་ཐབས་ལམ་ལ་བརྟེན་ནས་ལོ་བཅུ་ཕྲག་གཅིག་ལྷག་གི་རིང་ལ། སྡེ་ཚན་རེ་ལ་ལོ་གསུམ་དང་ཕྱེད་ཀའི་སློབ་ཚན་མཐར་ཕྱིན་པ་ཁྲིད་ནས་གྲུབ་དོན་ལག་འཁྱེར་སྤྲོད་ཅིང། ཉམས་ལེན་གྱི་རིམ་པ་ཡང་སྲོལ་བརྒྱུད་ལྟར་ཁྲིད་པ་འདི་གཞན་ལས་ཁྱད་པར་འཕགས་པ་ངོས་འཛིན་ཞུས་ནས་གཟེངས་རྟགས་ཕུལ་བ་ཡིན་ཞེས་གསུངས། གཉིས་པ་ནི། གཏོག་དབྱིབས་ནད་དུག་གི་སྐབས་སུ་སློབ་རྒན་ཚོས་ཆོས་ལུགས་རིས་མེད་ཀྱི་མི་རྣམས་སེམས་ཁམས་ཞི་བ་ལ་གནས་པའི་ཕྱིར་ཏུ། དྲན་པ་དབྱུག་ལ་གཏད་པ། དྲན་པ་ལུས་ལ་གཏད་པ། དྲན་པ་ཚོར་བ་ལ་གཏད་པའི་ཐབས་ལམ་ལ་བརྟེན་ནས་ལོ་གཉིས་ཀྱི་རིང་སྒོམ་ཁྲིད་རྒྱུན་སྐྱོང་བས་མི་མང་པོ་ཞིག་གི་སེམས་ཁམས་ལྷོད་དུ་འབབ་པ། སྐྱོ་སྣང་བསང་བ། འཇིགས་སྣང་ཞི་བ་སོགས་གྲུབ་འབྲས་ཆེན་པོ་ཐོན་པ་ངོས་འཛིན་ཞུས་ནས་གཟེངས་རྟགས་ཕུལ་བ་ཡིན་ཞེས་འགྲེལ་བརྗོད་གནང་སོང། དེ་རིང་གཟེངས་རྟགས་ཐོབ་པའི་ཆོས་ཚོགས་༣༢ ནང་ནས་སྐྱར་དུ་ཆོས་ཚོགས་༨ འདེམ་སྒྲུག་བྱས་ནས་ཚེས་༢༢ ལ་དམིགས་གསར་གྱི་བཅར་འདྲི་ཞུ་རྒྱུ་ཡིན་ཞེས་བརྡ་འཕྲིན་འབྱོར་སོང་བས། ང་ཚོའི་སློབ་མ་ཞིག་གིས་བཅར་དྲི་ལེན་འདེབས་བྱས་པ་རྣམས་ཚོགས་པ་དེའི་དྲ་ལམ་དུ་རིམ་བཞིན་འགོད་རྒྱུ་ཡིན་གསུངས། འདི་ནི་སྨར་ཚང་བསྟན་པའི་བདག་པོ་༧ འགྲོ་མགོན་གངས་རི་ཀརྨ་རིན་པོ་ཆེས་ཕྱི་ལོ་༢༠༠༨ ལོ་ལོན་གྲོན་ལ་སྨར་ཚང་བཀའ་བརྒྱུད་རྟག་བརྟན་ཕུན་ཚོགས་གླིང་ཕྱག་བཏབ་པ་ནས་བཟུང་ལོ་ངོ་བཅུ་ཕྲག་གཅིག་ལྷག་གི་རིང་ཉིན་མཚན་དབྱེར་མེད་འབད་བརྩོན་བྱས་པ་དང་། སྲི་ཞུ་ལས་བྱེད་ཚོས་ཀྱང་ལྷག་བསམ་བཟང་པོ་ཀུན་ནས་སླངས་ནས་འགྲོ་སོང་ཆེ་ཆུང་ཐམས་ཅད་སོ་སོའི་བཏང་ནས་འབད་བརྩོན་བྱས་པའིི་གྲུབ་འབྲས་གཟེངས་སུ་ཐོན་པའི་དཔང་རྟགས་གནང་བ་ལ་བརྟེན་ནས། སྲི་ཞུ་བ་རྣམས་སླར་ཡང་སེམས་ཤུགས་དང་སྙིང་སྟོབས་བསྐྱེད་པ་ལ་ཕན་ཐོག་ཆེན་པོ་བྱུང་སོང་བས། སྨར་ཚང་རྟག་བརྟན་ཕུན་ཚོགས་གླིང་གི་ལས་ཁུངས་ནས་དྲང་བདེན་གྱི་ལས་ལ་བརྩོན་པའི་the Faith &Belief Forum ཚོགས་པ་འདིའི་དབུ་ཁྲིད་དང་། ཉམས་ཞིབ་པ། ལས་བྱེད་ཡོངས་ལ་སྙིང་ཐག་པ་ནས་ཐུགས་རྗེ་ཆེན་ཞུས་ཀྱིན་ཡོད།
སྨར་ཚང་བཀའ་བརྒྱུད་ཀྱི་གདན་ས་ཤོ་ཙོམ་གཉིས་ཀྱི་དགོན་པ་དང་དགེ་འདུན་རྣམས་ཐོར་བཤིག་སོང་ནས་མི་ལོ་བརྒྱ་ཕྲག་འགའ་ཤས་སོང་བའི་རིང་། སྨར་ཚང་གི་བསྟན་པའི་ཡན་ལག་བྲག་གཡབ་ཕྱོགས་སུ་ཡོད་དོ་ཅོག་༧་གོང་ས་ལྔ་པ་ཆེན་པོ་ནས་བཟུང་གཅིག་ཀྱང་ལྷག་ལུས་མེད་པར་དགེ་ལུགས་སུ་གྱུར་ཟིན་པའི་ལོ་ཟླའི་དེ་ནས་བཟུང་། ཡུལ་དེར་སྨར་ཚང་གི་བཤད་སྒྲུབ་ཀྱི་བསྟན་པ་མཆི་མའི་ཐལ་བ་བཞིན་དོར་བས་རྗེས་ཤུལ་མེད་པར་གྱུར་ནས་མི་ལོ་བཞི་བརྒྱ་ཡན་མན་སོང་ཟིན་ལ།
ད་ལྟ་འགྲོ་མགོན་གངས་རི་ཀརྨ་རིན་པོ་ཆེ་མཆོག་གིས་མི་ལོ་བཅུ་ཕྲག་རིང་སྐུ་ངལ་འཛིང་མེད་ཀྱིས་བསྟན་པའི་མེ་རོ་གསོས་ནས། འཛམ་གླིང་ཤར་ནུབ་ཀུན་ལ་འཛིན་སྐྱོང་སྤེལ་གསུམ་གྱི་འོད་སྣང་འཕྲོས་པའི་ལྟེ་གནས་དེར། གདན་ས་ཤོ་ཙོམ་གཉིས་ཀྱི་མཚན་བྱང་ཡང་ཉ་ཆུ་དང་འགྲོགས་པ་ལྟར་རང་ཤུགས་སུ་འགྲོ་བར་ཆོས་ཉིད་ཡིན། འདི་ནས་ལོ་རབས་དྲུག་ཅུའི་གོང་རྙིང་བ་འཇམ་སྤྲུལ་དང་རག་སྤྲུལ་གཉིས་ཀྱིས་སོ་སོའི་འདོད་མོས་ལྟར་ཤོ་དགོན་གྱི་ཤུལ་མི་འདྲ་བ་གཉིས་སུ་ངོས་འཛིན་ནས། ལྷ་ཁང་རེ་བཞེངས་ཙམ་ལས་སྨར་ལུགས་བསྟན་པ་ཟུར་ཙམ་ཡང་སྤེལ་མྱོང་མེད།
ད་ལྟ་སྨར་ཚང་བཀའ་བརྒྱུད་ཀྱི་བསྟན་པའི་ཉི་འོད་སླར་ཡང་འཕྲོས་པའི་དུས་འདི། སྔར་ཡུལ་ལུང་དེ་དག་ཏུ་སྨར་ཚང་བཀའ་བརྒྱུད་ཀྱི་བསྟན་པ་གཞི་མེད་རྩ་བྲལ་བཟོས་མྱོང་བའི་བླ་སྤྲུལ་རྣམས་ཀྱིས་རྒྱབ་ནས་འཐབ་ཇུས་སྟོན། མདུན་དུ་གྲྭ་པ་དང་གྲྭ་ཟུར་རྣམས་འཆོང་ནས་སླར་ཡང་བསྟན་བཤིག་གི་ཆ་ཤས་སུ། སྨར་ཚང་གི་ལོ་རྒྱུས་དང་མཆོད་རྫས་རྫུན་ཟོ་བྱས་པ་སོགས་ལས་རིགས་སྣ་ཚོགས་སྤེལ་བ་རྣམས་རྐྱེན་ངན་གྲོགས་སུ་གྱུར་སོང་བས་ཐུགས་རྗེ་ཆེ་ཞུས།
བོད་མདོ་དབུས་ཁམས་གསུམ་གང་དུ་སྨར་ཚང་ལུགས་ཀྱི་བསྟན་པ་བཤད་སྒྲུབ་གཉིས་འཛིན་སྐྱོང་སྤེལ་གསུམ་བྱར་འདོད་ཡོད་ན། སྨར་ཚང་ལས་ཁུངས་ནས་མི་རྒྱུ་གཉིས་ཀྱིས་རྒྱབ་སྐྱོར་དང་རོགས་འདེབས་བྱ་ངེས་ཡིན་པས་འབྲེལ་གཏུག་ངེས་པར་གནང་རོགས། ཉེར་ཆ་མཆོད་རྫས་དང་ས་རྡོ་མང་པོ་པར་རྒྱག་ནས་སྨར་ཚང་ཤོ་ཙོམ་གཉིས་ཡིན་ཟེར་བ་སོགས་འུར་དཀྲོགས་བྱེད་པ་འདིར་བརྡ་ལན་སྤྲོད་འདོད་མེད་ཀྱང་། བྲག་གཡབ་བ་འཇམ་ནོར་དང་ཐུབ་བཀྲ་གཉིས་ཀྱིས་སྨར་ཚང་གི་ངོ་དེབ་ཐོག་ཏུ་ཚུར་སྒོ་རྡུང་བའི་རྐྱེན་ལ་རྟེན་ནས། ལུང་རིག་གཉིས་ཀྱིས་གཞི་མེད་ཅལ་འདྲོགས་རྣམས་རེ་རེ་བཞིན་ཚར་བཅད་ཟིན་ཡང་། ཤར་སྨར་ཡུལ་གྱི་ལོ་རྒྱུས་ལ་དུང་སེམས་ཅན་འགས་མཆོད་རྫས་ཀྱི་པར་རྣམས་བརྡ་ལན་དགོས་ཚུལ་ནན་བསྐུལ་བྱུང་བས། རྒྱས་པ་ཤོ་ཙོམ་དཔྱད་པའི་ཚངས་ཐིག་དང་། སྨར་བྲག་འཁྲུལ་སྤོང་བདེན་གཏམ་ལ་གཟིགས་རོགས། འདི་སྐབས་བབས་ཀྱི་དོན་གནད་ཆེ་བ་ཞྭ་མོ་ལ་དཔྱད་པ། སྐུ་འདྲ་ལ་དཔྱད་པ། ཌ་མ་རུ་ལ་དཔྱད་པ། ལི་ཝ་ཆོས་ལྡིང་དགོན་ལ་དཔྱད་པ། གནས་བདག་འབེ་ཉ་ལ་དཔྱད་པ། ཞོར་དུ་རྡོ་ཕུག་དང་རྡོ་ཁྲི་ལ་དཔྱད་པ། ལོ་རྒྱུས་ཡིག་བརྐུས་ལ་དཔྱད་པ། གུང་ཁྲན་གྱི་སྔོན་ཐོན་ལ་དཔྱད་པ་བཅས་ཡོད་པས་ཐེངས་རེ་ངེས་པར་གཟིགས་རོགས།
དང་པོ་ཆོས་རྗེ་སྨར་པའི་ཞྭ་མོ་ལ་དཔྱད་པ།
་་་་་་
་་་་་་་
འདི་སྨར་པའི་དབུ་ཞྭ་མིན་པར་དཔྱད་དོན་ངེས་པར་རྙེད་ཚུལ།
གོང་དུ་བླ་སྐུ་གཉིས་པོ་དེ་སྒམ་པོ་པ་དང་ཕག་གྲུ་པ་གཉིས་ཡིན། དེའི་འོག་ཏུ་རྗེ་སྨར་པ་ནས་བཟུང་ཕག་གྲུ་ལས་གྱེས་པའི་བཀའ་བརྒྱུད་པའི་སྲོལ་འབྱེད་བརྒྱད་ཀྱི་དབུ་ཞྭ་ལ་གཟིགས་པར་མཛོད། བླ་ཆེན་བརྒྱད་ཀྱི་དབུ་ཞྭ་ཡིན་ན་དམར་པོ་ཡིན་དགོས་ཏེ། འབྲུག་ཆེན་ཀུན་དགའ་དཔལ་འབྱོར་གྱི་བཀའ་བརྒྱུད་པའི་ཞྭ་བཤད་ལས། “ཞྭ་རྩེ་མོ་རྣོ་ཞིག་བྱིན་ཆགས་པ། །ཆོས་འབྲས་བུའི་རྒྱལ་ས་ཟིན་པའི་བརྡ། །ཞྭ་ཁ་དོག་དམར་པོ་འདུག་པ་འདི། །ཁམས་གསུམ་དབང་དུ་འདུས་པའི་བརྡ། །”ཞེས་གསུངས་པའི་ཞྭ་དང་ཡོངས་སུ་འགལ་བ་མངོན་སུམ་མཐོང་བས། ཞྭའི་ཁ་དོག་དང་ཟོ་དབྱིབས་ནི་རྗེ་སྨར་པའི་དབུ་ཞྭ་མིན་པར་མངོན་ཡོད། ལྷག་པར་དུ་རྗེ་སྨར་པ་ཕ་ཡུལ་དུ་བྱོན་ཁར་རྗེ་ཕག་གྲུ་པས་ཚོགས་ཁང་ནང་དུ་ཁྲི་ལ་བཞུགས་བཅུགས་ནས། ཁོང་གི་དབུ་ཞྭ་སྨར་པ་ལ་སྒྲོན་བཞིན་དུ་བུ་ཕ་དང་ཨེ་འདྲ་ལྟ་གསུངས་པ་སོགས་རྟེན་འབྲེལ་ཆེན་པོ་བརྩིས་པས། ཕག་མོ་གྲུ་པའི་དབུ་ཞྭ་དེ་བྱིན་ཆེན་འཛིན་ནས་ཆོས་འཆད་པའི་དུས་སུ་བཞེས་པར་མཛད།
ཞྭ་མོ་འདི་དྭགས་ཞྭ་ཡིན་ཚུལ་སྟོན་འདུག་ཀྱང་དྭགས་ཞྭའི་བཟོ་དབྱིབས་དང་རྣ་ཅོག་གཡས་གཡོན་ཐུར་དུ་རྐྱང་བ་གཉིས་ཞྭའི་སྐེད་པ་ནས་བཏགས་པ་འདི་ནོར་བ་རེད། འདི་ཟོ་དུས་བཀའ་བརྒྱུད་པའི་བླ་མ་ཞིག་ལ་དྲིས་ཡོད་ན། བཀའ་བརྒྱུད་ཀྱི་ཞྭ་ལ་འདྲ་ཚུལ་ཆེན་ཙམ་བཟོས་ཐུབ་ཡོད་སྲིད། བཀའ་བརྒྱུད་ཞྭ་བཤད་ལས། “ཞྭ་རྩེ་མོ་སྦུབས་སུ་འཁྱིལ་བ་འདི། །ཆོས་ཟབ་ས་གཉིས་སུ་མེད་པའི་བརྡ། །ཞྭ་ཐོད་ཀྱི་གདོང་ཀ་མཐོ་བ་འདི། །ཆོས་ལྟ་བའི་གནམ་འཕང་སྤྱོད་པའི་བརྡ། །”སོགས་གསུངས་པ་ལྟར། ཞྭ་རྫུན་འདི་རྩེ་མོ་དང་གདོང་ཀ་མཐོ་བ་གཉིས་ཀ་ཚང་མེད་པས་སྨར་པའི་ཞྭ་མོ་ཡིན་མདོག་བྱས་ཀྱང་དངོས་པོ་རང་གིས་རྫུན་རྐུབ་བརྡོལ།
གལ་ཏེ། རྗེ་སྨར་པའི་དབུ་ཞྭ་དངོས་གནས་ཤིག་ལྷག་ཡོད་ན་ཡང་། ད་ལྟ་སྨར་ཚང་གི་མཆོད་རྫས་ཡོད་ཟེར་བའི་བྲག་གཡབ་ཀྱི་ཁོར་ཡུག་ནང་དུ། ས་བཀའ་རྙིང་གསུམ་གྱི་བླ་མའི་མཆོད་རྫས་རྣམས་སྐྱ་སེར་སུ་ཞིག་གི་ཁྱིམ་ནང་དུ་ཡོད་ན། སྲུང་མ་དོལ་རྒྱལ་འཁྲུག་རྐྱེན་གྱི་རྒྱུ་རྫས་གདུག་པ་ཅན་དུ་བརྩིས་ནས་མི་ལ་བསྲེགས་པ་དང་ཆུ་ལ་དོར་བ་སོགས་མིང་མེད་རྩ་གཏོར་བཏང་ཟིན་པའི་ཡུལ་ཞིག་ན། བཀའ་བརྒྱུད་ཀྱི་བླ་མའི་དབུ་ཞྭ་དང་། ཌ་མ་རུ། རྔ་སོགས་མཆོད་རྫས་རྙིང་རོ་རྣམས་ལྷག་མི་སྲིད་པ་རེད། གུང་ཁྲན་གྱིས་རིག་གནས་གསར་བརྗེད་སྐབས་ཕྱི་ནས་དྲག་གནོན་བྱས་ཀྱང་ནང་དུ་དམངས་ཀྱི་སེམས་ལ་ཆོས་དད་ཡོད་པས་མཆོད་རྫས་སྦས་པ་སོགས་བྱུང་ཡོད་ལ། འོན་ཏེ། དོལ་རྒྱལ་དར་བའི་ཡུལ་གྲུ་ཀུན་ལ་དམངས་ཀྱི་སེམས་ནང་དུ། ས་རྙིང་བཀའ་གསུམ་གྱི་བླ་མའི་མཆོད་རྫས་རྣམས་དོལ་རྒྱལ་འཁྲུག་རྐྱེན་ཁོ་ན་བརྩིས་ནས་དོར་ཅི་ཐུབ་བྱས་པའི་ཡུལ་ཞིག་ན། སྨར་ཚང་གི་བླ་མའི་ཌ་རུ་དང་རྔ་རྣམས་ལྷག་སྲིད་པའི་ཁོར་ཡུག་གཏན་ནས་མེད་པའི་གནད་ཀྱིས་ཡིན། དང་པོ། ཞྭ་འདི་རྗེ་སྨར་པའི་ཞྭ་ཡིན་པར་སུས་ཤེས་པར་ཡིན་ནམ། གཉིས་པ། སྨར་པའི་དབུ་ཞྭ་ཡིན་པའི་ལོ་རྒྱུས་ཡིག་ཆ་ཁུངས་ཡོད་དམ། གསུམ་པ། རྗེ་སྨར་པ་ཕ་ཡུལ་དུ་བྱོན་པའི་དུས་རབས་དང་མཐུན་དགོས་པས་ཞྭ་འདི་སྨར་ཚང་ལས་ཁུངས་ཀྱི་མི་སྣ་ལྷན་དུ་གློག་འཕྲུལ་ནང་ལ་བརྟག་དཔྱད་བྱེད་ཕོད་དམ། དྲི་བ་འདི་འཇམ་ནོར་ལ་ཐེངས་བཅུ་ཕྲག་གཅིག་དྲིས་བཅུགས་ཀྱང་དྲིས་ལན་ཚིག་གཅིག་མེད་པར་ཚིག་ངན་སྣ་ཚོགས་ལབ་ནས་སྡུག་སྒོམ་རྒྱག་ཅི་ཐུབ་བྱས།
་་་་་་་་་་་་་་་་་་་་
༡་སྨར་པ་ལ་དྭགས་ཞྭ་སྒྲོན་པ། ༢་སྨར་པ་ལ་ཉི་ཟླའི་རྒྱན་པའི་ཞྭ་སྒྲོན་པ། ༣་སྨར་པ་ལ་ཚོགས་ཞིང་དུ་པཎ་ཞྭ་སྒྲོན་པ།
རྗེ་སྨར་པ་རིན་པོ་ཆེ་ལ་སློབ་མ་རྣམས་ཀྱིས་དྭགས་ཞྭ་སྒྲོན་པའི་སྐུ་འདྲ་བཞེངས་པ་མཐོང་རྒྱུ་མེད་ཀྱང་། རྫ་གསེར་ཞུ་དགོན་པའི་བཀའ་བརྒྱུད་ཀྱི་བླ་མ་རྣམས་བཞེངས་པའི་སྐབས་སུ། རྗེ་སྨར་པ་ལ་དྭགས་ཞྭ་སྒྲོན་པའི་ངོ་དབྱིབས་འདི་ཅུད་ཟད་མི་འདྲ་བ་འདུག་ཀྱང་། སྐུ་བཞེངས་མཁན་གྱིས་ཁྱད་པར་ཤོར་བ་རྗེ་ཙོང་ཁ་པའི་སྐུ་བརྙན་སོགས་ལ་བལྟ་ན་ངེས་པར་རྙེད་སླ་བས་བཤད་པར་མི་བྱ། སྨར་ཚང་གི་དཔེ་རྙིང་ཟུར་དུ་རྗེ་སྨར་པ་ལ་དབུ་ཞྭ་གཤོག་སྒྲོ་གནམ་ལ་བརྐྱངས་པ་ལྟ་བུ་དང་། མདུན་ནས་མཐོ་བ། གདོང་ལ་ཉི་ཟླ་ཟུང་གཅིག་བྲིས་པ་འདི་ཤོ་ཙོམ་ཉི་ཟླ་ཟུང་གཅིག་གི་མཚོན་བྱེད་ཡིན་དམ་སྙམ་པ་ལས་ཁུངས་སྐྱེལ་མ་རྙེད། སྨར་ཚང་ལམ་རིམ་གྱི་ཚོགས་ཞིང་གི་དབུས་སུ་རྗེ་སྨར་པའི་སྐུ་ལ་པཎ་ཞྭ་སྒྲོན་པ་ནི་མདོ་སྔགས་གཉིས་ལ་མཁས་གྲུབ་གཉིས་ལྡན་ཡིན་པ་སོགས་ཁྱད་ཆོས་མང་པོ་ཞིག་ལ་ལྟོས་ཡོད། འདི་ལས་ལྷག་པ་ཞིག་སྐུ་འདྲ་དང་ལོ་རྒྱུས་མཐོང་རྒྱུ་མེད་ལ། སྨར་ཚང་བཀའ་བརྒྱུད་ཀྱིས་རྗེ་སྨར་པའི་ཞལ་རས་དང། དབུ་ཞྭ། ཕྱག་མཚན་སོགས་རེ་རེ་བཞིན་ནན་ཏན་བྱས་ནས་བཀོད་བསྒྲིགས་བྱས་ཡོད།
་་་་་་་་་་་་་་་་་་་་་་་་་་་་
གཉིས་པ་སྐུ་འདྲ་དང་ཞྭ་མོ་ལ་དཔྱད་པ།
དང་པོ་སྐུ་འདྲ་འདི་ཞྭ་མདོག་སེར་པོ་ཡིན་པ་དང་ཞྭ་དབྱིབས་རི་བོ་དགེ་ལུགས་པའི་པཎ་ཆེན་བློ་བཟང་ཆོས་རྒྱན་སོགས་ལམ་རིམ་ཉམས་ལེན་པ་འགའ་ཤས་ཀྱིས་ཞྭ་སེར་འདི་འདྲ་གྱོན་སྲོལ་ཡོད། ཞྭ་འདི་ལ་བྱང་ཆུབ་སེམས་ཞྭ་ཟེར་བ་སོགས་མིང་འདོགས་མི་འདྲ་བ་དང་ཞྭའི་དབྱིབས་ཅུང་ཟད་མི་འདྲ་བ་ཡོད་ཀྱང་ཞྭ་ཁོག་དང་། ཞྭ་སེར་པོ་ཡིན་པ་སོགས་གཅིག་མཚུངས་ཡིན་པས། རྗེ་སྨར་པ་ཡིན་ཟེར་བའི་སྐུ་འདྲའི་དབུ་ཞྭ་འདིའི་ཁྱད་ཆོས་གཅིག་པུས་རི་བོ་དགེ་ལྡན་པའི་དབུ་ཞྭ་ཞིག་ཡིན་ཞེས་དངོས་པོ་རང་གིས་ཁ་ཚུར་གྲགས་འདུག་པས་འགྲེལ་བཤད་འདི་ལས་དགོས་དོན་ཅི་ཡང་མེད་པར་མཐོང་།
གཉིས་པ་སྐུ་འདྲ་ལ་དཔྱད་པ། སྐུ་འདྲ་འདིའི་རྣ་ཅོག་བོང་བུའི་རྣ་ཅོག་འདྲ་བ་དང་། སྣའི་མགོ་དོག་དོག་ཕག་པའི་སྣ་འདྲ་བ། ཁ་དང་མཆུ་སྒྲོས་སྤྲེའུ་འདྲ་བ། མགྲིན་པ་ཡི་དྭགས་འདྲ་བ་སོགས་ལུས་དབྱིབས་ཀྱི་ཆ་ནས་རྗེ་སྨར་པའི་སྐུ་བརྙན་ལ་ཟུར་ཙམ་ཡང་འདྲ་བའི་མཚོན་བྱེད་མི་འདུག་པས། སྨར་ཚང་ཉམས་ཞིབ་ཁང་གིས་རྗེ་སྨར་པའི་འདྲ་སྐུའི་གྲས་ལས་ཕྱིར་ཕུད་ཟིན་པ་ཡིན། འཇམ་སྤྲུལ་དང་རག་སྤྲུལ་གཉིས་ཀྱིས་ལྷ་ཁང་བཞེངས་དུས་གྱང་རོ་ལས་གཅིག་ཀྱང་ལྷག་མེད་ཚུལ་བཤད་ཟིན་ཀྱང་གློ་བུར་དུ་སྐུ་འདྲ་འདི་ཐོན་ཡོང་བར་ཡ་མཚན་ཆེན་བ་མ་ཡིན་སྙམ། དང་པོ། འདི་རྗེ་སྨར་པའི་སྐུ་འདྲ་ཡིན་པར་སུའི་ཤེས་པ་ཡིན་ནམ། གཉིས་པ། འདི་རྗེ་སྨར་པའི་འདྲ་སྐུ་ཡིན་པའི་དཔང་ཡིག་ཡོད་དམ། ཞེས་དྲི་བ་འདི་འཇམ་ནོར་ལ་ཐེངས་བཅུ་ཕྲག་གཅིག་དྲིས་བཅུགས་ཀྱང་རི་བོང་སྡོད་ཚུལ་ལྟར་སྔུག་སྒོམ་བརྒྱག་ཅི་ཐུབ་བྱས་པ་ལས་བརྡ་ལན་ཚིག་གཅིག་སྤྲོད་མི་ཐུབ་པར་གྱུར་ཡོད།
གསུམ་པ་ཌ་རུ་ལ་དཔྱད་པ།
ཨ་འགོ་བླ་མའི་ཌ་མ་རུ་དང་རྔ་ལ་དཔྱད་པ།
མདའ་མདོ་དགོན་པས་རྗེ་སྨར་པའི་ཌ་མ་རུ་ཡིན་ཟེར་བ་འདི་དགོན་པའི་ཉེ་འཁོར་ཡུལ་མི་ལ་དྲིས་དུས་ཨ་འགོ་བླ་མའི་ཌ་རུ་རེད་ཟེར་བ། བདག་པོ་མེད་པའི་ཌ་རུ་བཅོས་མ་རེད་ཟེར་བ་སོགས་བཤད་ཚུལ་མི་མཐུན་པ་ཇི་མང་ནས་ཇི་མང་རེད་འདུག་ལ། རྔ་ནི་དེ་བས་ཀྱང་ཁུངས་མེད་ཡིན་པས་དཔྱད་འོས་པ་མ་མཐོང་། གལ་ཏེ་གནས་ཚུལ་འདི་དག་གྲྭ་པ་ཞིག་གིས་ཤེས་བཞིན་དུ་ཆེད་མངགས་རྫུན་སྐྲུན་བྱས་པ་ཡིན་ན་རྫབ་ཆེན་པོ་རེད་ལ། སྨར་ཚང་བཀའ་བརྒྱུད་ལོ་རྒྱུས་ཉམས་ཞིབ་ཁང་གིས་མི་ལོ་བཅུ་ཕྲག་གི་རིང་ལ་རྒྱུ་གྲོན་ཕོན་ཆེར་སྦྱར་ནས་ཉུལ་གཞིགས་བྱས་པའི་ཉེན་ལེན་ལ། ཆོས་རྗེ་སྨར་པ་དང་འགྲོ་མགོན་རིན་ཆེན་སོགས་སྨར་ཚང་གི་སྐྱེ་མཆོག་རྣམས་ཀྱི་མཆོད་རྫས་རིན་ཐང་ཅན་མི་ཉུང་བ་ཞིག་སྨར་ཚང་ལས་ཁུངས་ཀྱི་ཕྱག་ཏུ་སོན་པའི་ཁྲོད་ན། རྗེ་སྨར་པའི་ཌ་རུ་མི་ཐོད་རི་མོ་གཅིག་པ་ཡིན་པ་ལ། དངུལ་བཀྲིས་ལ་གསེར་དམར་སྦྱར་ཞིང་གསེར་སེར་གྱིས་ཚག་རྒྱག་ཅིང་། གཟི་མིག་དགུ་པའི་ལུང་རྒྱན་བྱས་པ་ཞིག་རྙེད་པ་འདི། གནའ་རྫས་ཐོ་ཡིག་ནང་དུ་བཀོད་པ་ཇི་བཞིན་ཡིན་པས་ངེས་རྙེད་ཐུབ་པ་བྱུང་ཡོད། རིམ་བཞིན་སྨར་ཚང་བཀའ་བརྒྱུད་ཀྱིས་འགྲན་སྟོན་བཤམ་རྒྱུའི་གྲལ་སྒྲིག་བྱེད་བཞིན་ཡོད།
བཞི་པ་ལི་ཝ་ཆོས་ལྡིང་དགོན་སྨར་ཚང་གི་དགོན་ལག་ཡིན་མིན་ལ་དཔྱད་པ།
མདའ་མདོ་དགོན་པའི་རྒན་ཕུན་ཚོགས་ལགས་ཀྱིས་དགོན་པའི་ལོ་རྒྱུས་ལས། “བྲག་གཡབ་རྫོང་བྱམས་མདུན་གྲོང་རྡལ་མདའ་མདོ་གྲོང་ཚོར་གནས་ཡོད་ཅིང་།”ཞེས་སོགས་ནས། “ཆོས་རྗེ་སྨར་པ་གྲུབ་ཐོབ་ཤེས་རབ་ཡེ་ཤེས་ཀྱིས་དགུང་ལོ་སོ་གཉིས་པར་སྤྱི་ལོ་༡༡༦༧་ལོར་རང་ཡུལ་སྨར་ཁམས་སྒང་དུ་ཤོ་མདའ་གྲོང་གི་དགོན་པ་སྨར་ཚང་བཀའ་བརྒྱུད་ཀྱི་གདན་ས་ཆེན་མོ་དཔལ་གྱི་ཤོ་དགོན་ཟེར་བ་ཞིག་ཕྱག་བཏབ་ཅིང་། དེའི་དགོན་ལག་གི་གྲས་སུ་མདའ་མདོ་དགོན་ཕྱག་བཏབ་སྟེ་མིང་ལ་ལི་ཝ་ཆོས་ལྡིང་དགོན་ཟེར།” ཞེས་བྲིས་འདུག་ཀྱང་། ལི་ཝ་ཆོས་ལྡིང་དགོན་འདི་རྗེ་སྨར་པའི་རྣམ་ཐར་དང་། ཙོམ་མདོའི་གདན་རབས། སྤང་མཁན་ཆེན་གྱི་རྣམ་ཐར་སོགས་སྨར་ཚང་གི་ལོ་རྒྱུས་ཁུངས་ལྡན་གང་དུ་ཡང་མེད་པས། རྗེ་སྨར་པས་ཕྱག་བཏབ་པའི་དགོན་པ་ཡིན་པའི་ཁུངས་སྐྱེལ་མ་རྙེད་བར་དུ། སྨར་ཚང་བཀའ་བརྒྱུད་ཀྱི་དགོན་ལག་ཐོར་སོང་བའི་ལོ་རྒྱུས་ཀྱི་གྲས་སུ་འཇོག་ཐུབ་ཐབས་མེད་ལ། རྗེ་འགྲོ་མགོན་རིན་ཆེན་སོགས་སྨར་ཚང་གི་བླ་མ་རྣམས་ཀྱིས་ཕྱག་བཏབ་པའི་དགོན་ལག་ཡོངས་སུ་ཉམས་ཞིབ་བྱས་དང་བྱེད་བཞིན་པའི་གྲས་སུ་། དུས་ད་ལྟའི་བར་ལི་ཝ་ཆོས་ལྡིང་དགོན་ཟེར་བ་ཞིག་ལོ་རྒྱུས་རྙེད་མེད། གལ་ཏེ། ཁྱེད་ཚོས་རྙེད་སོན་བྱུང་ཚེ་ངེས་པར་དུ་སྨར་ཚང་བཀའ་བརྒྱུད་ཀྱི་དགོན་ལག་གྲས་སུ་བཀོད་ངེས་ཡིན། འདི་ག་སྨར་ཚང་ལོ་རྒྱུས་ཉམས་ཞིབ་ཁང་གིས་མི་ལོ་བརྒྱད་བརྒྱ་ལྷག་སོང་ཟིན་པའི་ལོ་རྒྱུས་རྣམས་ཁ་སྒྲུང་ལ་ཁུངས་སྐྱེལ་ཚེ་དཔྱད་གཞིའི་གྲས་ལས་ཕྱིར་ཕུད་ཀྱིས་ཡོད།
ཡང་ཕུན་ཚོགས་ལགས་ཀྱིས་ལོ་རྒྱུས་དེ་ཉིད་ལས། “དེ་ནས་མདའ་མདོ་ལི་ཝ་ཆོས་ལྡིང་དགོན་དུ་འདུས་ཏེ་རྒྱལ་དབང་ལྔ་པའི་དུས་སུ་དགེ་ལུགས་སུ་འགྱུར་ཏེ་ད་ལྟ་མདའ་མདོ་དགོན་པ་འདི་ཉིད་ཡིན།” ཞེས་བྲིས་པའི་ཚུལ་འདི་ལྟ་བུ་བོད་ཀྱི་ལོ་རྒྱུས་བྲིས་པའི་ནང་དུ་ཆེས་མང་པོ་ཡོད། འདྲིས་པ། ཐིམ་པ། འདུས་པ་ཟེར་བ་སོགས་མ་བརྟགས་མ་དཔྱད་པར་རང་སྣང་སྤྲོ་བའི་ངང་ནས་བཤད་མཁན་ཡོད་པས། ཕྱི་རབས་པ་རྣམས་ལ་ཕན་པའི་ཕྱིར་ཅུང་ཟད་དཔྱད་ན། འདུས་ཟེར་བ་འདི། གྲྭ་པ་འདུས་པ། ཆོས་བརྒྱུད་འདུས་པ། མཆོད་རྫས་འདུས་པ་གསུམ་ལ་དབྱེར་ན། དང་པོ་སོག་པོས་ཤོ་དགོན་དུ་ལོ་ཉི་ཤུའི་རིང་དམག་སྒར་བྱས་པས་གྲྭ་པ་སྟོང་ཟིན་པས། ལི་ཝ་དགོན་ལ་འདུས་ཡོང་རྒྱུས་གྲྭ་པ་གཅིག་ཀྱང་མེད་ཚུལ་ལོ་རྒྱུས་ལ་བལྟས་ན་ཤེས། གཉིས་པ། བླ་གྲྭ་མེད་ན་ཆོས་བརྒྱུད་འདུས་ཡོང་རྒྱུ་མེད་པར་དོན་གྱིས་རྟོགས་ཐུབ་ལ། གསུམ་པ། སོག་དམག་ཤོ་དགོན་དུ་ཡོང་དུས་མཆོད་རྫས་རྩ་ཆེན་རྣམས་རི་བྲག་སུལ་དུ་སྦས་ཐུབ་ཡོད་ཅིང་། སྦས་མི་ཐུབ་པའི་རིགས་རྣམས་སོག་པོས་འཁྱེར་སོང་ཚུལ་གསལ་བར་མངོན་ཡོད། གལ་ཏེ། ལི་ཝ་དགོན་འདི་སྨར་ཚང་གི་དགོན་པ་ཡིན་པའི་དབང་དུ་བཏང་ན་ཡང་།
ལི་ཝ་དགོན་པ་འདི་དགེ་འདུན་རྣམས་རྒྱལ་དབང་ལྔ་པའི་དུས་དགེ་ལུགས་སུ་གྱུར་བས་དགེ་ལུགས་ཀྱི་བསྟན་པ་ལ་ཐོས་བསམ་སྒོམ་གསུམ་བྱེད་པའི་ལོ་དུས་དེ་ནས་བཟུང་། སྨར་ཚང་བཀའ་བརྒྱུད་ཀྱི་ཐོས་བསམ་སྒོམ་གསུམ་བྱས་པའི་ལི་ཝ་ཆོས་ལྡིང་དགོན་དེ་སྟོང་པ་དང་། སྨར་ཚང་གི་བསྟན་པ་ཕྱིར་ཕུད་པ། སྨར་ཚང་གི་བསྟན་པ་དོར་བ་ཡིན་པས། དགོན་མིང་ཡང་དོར་ནས་མདའ་མདོ་བཤད་སྒྲུབ་དར་རྒྱས་གླིང་ཞེས་བསྒྱུར་འདུག་པས། སྨར་ཚང་གི་མིང་ཙམ་ཡང་འབོད་འདོད་མེད་པའི་དོལ་རྒྱལ་དགོན་པ་གཅིག་གིས་ད་ལྟ་གློ་བུར་དུ་སྨར་ཚང་གི་དགོན་ལག་ཡིན་ཟེར་བ་འདི། དུར་ཁྲོད་སེལ་བ་ཚལ་གྱི་བུ་རོ་གཅིག་ལ་དར་མ་མདོ་སྡེ་གྲོང་འཇུག་བྱས་ནས་བུ་དེ་ཡིན་མདོག་སྟོན་པ་ལྟར། སྨར་ཚང་བཀའ་བརྒྱུད་བསྟན་པ་བཤིག་ནས་ལོ་བཞི་བརྒྱའི་རྗེས་སུ། མདའ་མདོ་དགོན་པ་ཤོ་དགོན་གྱི་མིང་ལ་གྲོང་འཇུག་བྱས་ནས་ཡིན་མདོག་སྟོན་པ་འདི་དགོད་བྲོ་མོ་རེད་ལ། དོན་དངོས་དང་ཡོངས་སུ་འགལ་བ་ཞིག་ཀྱང་རེད། དེའི་ཚེ་དེའི་དུས་བཀའ་བརྒྱུད་ཀྱི་བླ་མས་བཏགས་པའི་དགོན་མིང་ཙམ་ཡང་རང་སྲོལ་མི་བཞག་པའི་ཚུལ་འདིར་ཞིབ་མོ་བལྟས་དུས། རྣམ་དཔྱོད་ལྡན་པ་ཞིག་ཡིན་ན་དགོན་འདིའི་ནང་དུ་རྗེ་སྨར་པའི་སྐུ་འདྲ་དང་། ཞྭ་མོ། ཌ་མ་རུ། རྔ་སོགས་མཆོད་རྫས་རྣམས་གནས་ཐུབ་པའི་ཁོར་ཡུག་གཅིག་ཡིན་མིན་ངེས་པར་རྙེད་སླ་བ་ཞིག་ཏུ་གྱུར་ཡོད།
འདི་དགོད་བྲོ་བ་ཡོད་དེ། བྲག་གཡབ་བ་པདྨས་ཤོ་དགོན་དེ་རིམ་པ་མང་པོ་རྒྱུན་ནས་བླ་དཔོན་སྦྲག་མ་གཅིག་རང་གྲུབ་དཔོན་ཚང་ལ་འདྲིས་ཟེར། ཡང་གཅིག་བཤད་དུས་ཤོ་དགོན་གྱི་མགོན་ཁང་རྟེན་དང་བཅས་པ་དུས་འགྱུར་གྱི་བར་ཡོད་ཟེར། བྲག་གཡབ་བ་མི་བུ་འགའ་ཤས་པདྨའི་སྒྲུང་གི་རྗེས་སུ་འདྲོགས་ནས་རྩོམ་རྙོག་འགའ་ཤས་བྲིས། ད་ལྟ་རྒན་ཕུན་ཚོགས་ཀྱིས་ཤོ་དགོན་དེ་ལི་ཝ་དགོན་ལ་འདུས། ལི་ཝ་ལྡིང་དགོན་དེ་དགེ་ལུགས་ལ་འདུས་ཟེར། ཤོ་དགོན་གྱི་ལོ་རྒྱུས་དེ་བྱ་འུག་པའི་ཆོས་བཤད་འདྲ་བོ་གཅིག་ལས་གཅིག་དགོད་བྲོ་བ་ཉིད་དུ་གྱུར་སོང་།
ཕུན་ཚོགས་ལགས་ཀྱིས་དེ་ཉིད་ལས། “སྨར་ཚང་བཀའ་བརྒྱུད་ནས་ད་བར་ལོ་ངོ་བརྒྱད་བརྒྱ་ལྔ་བཅུ་ལྷག་གི་ལོ་རྒྱུས་ལྡན་ཞིང་། ད་ལྟ་འཇམ་མགོན་རྒྱལ་བ་གཉིས་པ་ཙོང་ཁ་པ་ཆེན་པོའི་རིང་ལུགས་དྲི་མ་མེད་པར་འཛིན་སྐྱོང་སྤེལ་བའི་དགོན་སྡེ་ཞིག་ཏུ་གྱུར།”ཞེས་ལོ་བརྒྱད་བརྒྱ་ལྔ་བཅུ་ལྷག་ཟེར་བ་ནི་ཧམ་རྫུན་ཡིན། དགོན་འདི་སྨར་ཚང་བཀའ་བརྒྱུ་མ་ཡིན་པར་ཐལ། རྗེ་ཙོང་ཁ་པའི་རིང་ལུགས་དྲི་མ་མེད་པར་འཛིན་སྐྱོང་སྤེལ་བའི་དགོན་སྡེ་ཡིན་པའི་ཕྱིར། དགོན་འདི་ཤོ་དགོན་འདུས་མེད་པར་ཐལ། ལོ་འཁོར་ཧྲིལ་པོ་སྨར་ཚང་གི་ཆོས་ཀྱི་བྱེད་སྒོ་གཅིག་ཀྱང་མེད་པའི་ཕྱིར། ཞེས་རིག་ལམ་ཁས་ལེན་མཁན་གཅིག་ཡིན་ན། ཐལ་རྟགས་གཅིག་གིས་ཚར་བཅད་ཚར་རེད། འོན་ཏེ། མི་འདི་དག་རྨོ་རྒན་ཁོག་གཅིག་དང་འདྲ་བས། སྐབས་རེ་སྨར་ཚང་འདི་མི་གཅིག་ཡིན་པའི་ཟོ་འདྲ་བོ་བཤད་། སྐབས་རེ་སྨར་ཚང་འདི་མཆོད་རྫས་འགའ་ཤས་ཡིན་པའི་བཟོ་འདྲ་བོ་བཤད། སྐབས་རེ་སྨར་ཚང་འདི་དགོན་ཤུལ་གྱང་རོ་གཅིག་ཡིན་པའི་ཟོ་འདྲ་བོ་བཤད། སྐབས་རེ་སྨར་ཚང་འདི་དགོན་མིང་གཅིག་ཡིན་པའི་ཟོ་འདྲ་བོ་བཤད། ད་ལྟ་སྨར་ཚང་གི་མིང་དང་མཆོད་རྫས་རྫུན་ཟོ་བྱ་རྒྱུའི་དམིགས་ཡུལ་ཁོ་ན་བཅངས་ནས་རྩོད་པ་ཙམ་ལས། སྨར་ཚང་ཉམས་གསོ་བྱས་ནས་མི་ལོ་བཅུ་ཕྲག་གི་རིང་སྨར་ལུགས་ཀྱི་ལྟ་སྒོམ་སྤྱོད་གསུམ་འཛིན་སྐྱོད་སྤེལ་གསུམ་བྱས་མྱོང་བ་དང་། བྱེད་བཞིན་པ། བྱ་ངེས་པའི་སྐོར་ཚིག་གཅིག་ཀྱང་ཤོད་མཁན་བྱུང་མེད་པ་འདི། བ་རྔ་བསྟན་ནས་བོང་ཤ་འཚོང་འདོད་ཁོ་ན་ཡིན་པར་མངོན་རྗེན་དོན་པོར་གྱུར་ཡོད། དང་པོ་ལི་ཝ་ཆོས་ལྡིང་དགོན་འདི་སྨར་ཚང་གི་ལོ་རྒྱུས་གང་དུ་ཡོད་དམ། གཉིས་པ་ཤོ་དགོན་ལི་ཝ་ཆོས་ལྡིང་དགོན་དུ་འདུས་པའི་ལོ་རྒྱུས་དཔང་ཡིག་གང་དུ་ཡོད་དམ། གསུམ་པ་རྒྱལ་བ་ལྔ་པའི་དུས་ལི་ཝ་ཆོས་ལྡིང་དགོན་དགེ་ལུགས་སུ་གྱུར་པའི་ལོ་རྒྱུས་གང་དུ་ཡོད་དམ། བཞི་པ་མདོ་ལྷུའི་རི་ཤོ་དགོན་གྱི་གནས་ཤུལ་ཡིན་ཚུལ་སྨར་ཚང་བླ་རབས་དགུའི་རྣམ་ཐར་གང་དུ་ཡོད་དམ།
ལྔ་པ་གནས་བདག་འབེ་ཉ་ལ་དཔྱད་པ།
་
རྗེ་སྨར་པ་རིན་པོ་ཆེས་དཔལ་བཀྲ་ཤིས་དགོན་པའི་གནས་བཤད་ལས། “བྱང་སེམས་ཀླུ་ཆེན་རྒྱབ་རི་ཡིས། །ཉམས་དགའ་བཞི་ཡི་ཐུང་ཆུ་སྟེར། །ཕྱོགས་སྐྱོང་རིའི་ར་བས་བསྐོར། །བཀའ་བརྒྱུད་ཆོས་སྐྱོང་འདུ་བའི་བརྟགས། །བྱང་ནས་ཆོས་སྐྱོང་ལྷ་མོས་བསྐོར། །ཕྱི་ནང་བར་ཆད་མེད་པའི་བརྟགས། །”ཞེས་གསུངས་པ་ལྟར། དཔལ་བཀྲ་ཤིས་དགོན་པའི་རྒྱབ་རི་ལ་བྱང་སེམས་ཀླུ་ཆེན་ཟེར་བ་དང་། ཕྱོགས་སྐྱོང་རི་ཟེར་བ་དེས་རྒྱབ་རིའི་མཐའ་ནས་ར་བ་ལྟར་བསྐོར་ཡོད་པ་དང་། བྱང་གི་ཕྱོགས་ནས་ཆོས་སྐྱོང་ཟེར་བའི་རི་དེས་བསྐོར་ནས་ཡོད་པ་དང་། རི་དེའི་གནས་བདག་ལྷ་མོ་ཞིག་ཡིན་པར་གསལ་པོ་གསུངས་པའི་ནང་དུ། གནས་བདག་འབེ་ཉ་ཟེར་བ་གཅིག་མེད་པར་མ་ཟད། གྲུབ་ཆེན་གཤའ་པའི་རྣམ་ཐར། སྤང་མཁན་ཆེན་གྱི་རྣམ་ཐར། ཙོམ་མདོའི་བླ་རབས་སོགས་ལོ་རྒྱུས་གང་དུ་ཡང་། ཤོ་དགོན་གྱི་གནས་བདག་འབེ་ཉ་ཟེར་བ་གཅིག་སྒྲ་དྲི་མ་བྲོ་སར་མེད་པས། གནས་བདག་འབེ་ཉ་འདི་གཅིག་པུས་ས་གནས་འདི་ཤོ་དགོན་གྱི་གནས་ཤུལ་མིན་པའི་དཔང་བརྟགས་ཆེན་པོར་གྱུར་ཡོད།
དྲུག་པ་ཤོ་དགོན་གྱི་གནས་ཤུལ་ལ་ཉམས་ཞིབ་ངེས་པར་རྙེད་པ།
་་
པར་འདི་གཉིས་མདོ་ལྷུ་རི་ལ་འཇམ་སྤྲུལ་གྱི་ལྷ་ཁང་རེད། པར་འདི་དགོན་སྟེང་རག་སྤྲུལ་གྱི་ལྷ་ཁང་གི་ས་རེད།
མདོ་ལྷུའི་རི་དང་དགོན་སྟེང་གི་བར་འཕྲུལ་རྟ་གཞོན་ནས་ཆུ་ཚོད་ཕྱེད་ལྷག་འགྲོ་དགོས་པའི་བར་སྟོང་ཡོད། ཁོང་གཉིས་ཀ་ལ་ས་གནས་དེ་གཉིས་ཤོ་དགོན་གྱི་གནས་ཤུལ་ཡིན་པའི་ཁུངས་སྐྱེལ་ཅི་ཡང་མེད། བྲག་གཡབ་བ་རེ་ཟུང་གིས་འདི་ཤོ་དགོན་གྱི་གནས་ཤུལ་ཡིན་ཞེས་སྡིག་པ་མིག་བཙུགས་བྱས་ནས་ཨུ་ཚུགས་མཐར་སྐྱེལ་བྱས་པ་དང་། རག་སྤྲུལ་གྱིས་སྨར་ཚང་ལོ་རྒྱུས་ལས་བཤད་པ་གཉིས་ནང་འགལ་རྫབ་ཆེན་གྱུར་ཚུལ་ཤོ་ཙོམ་དཔྱད་པའི་ཚངས་ཐིག་ལ་ཞིབ་རྒྱས་ཡོད་པས་འདི་ངོ་སྤྲོད་ཙམ་ཡིན།
འཇམ་སྤྲུལ་གྱི་ལྷ་ཁང་གི་གྱང་རོ་ལ་ཡོད་པའི་རྡོ་སྐུ་འདི་དང་། རས་གོན་གཡོག་པའི་རྡོ་སྐུ་འདི་གཉིས་གཅིག་རེད།
སྨར་ཚང་ཉམས་ཞིབ་ཁང་གིས་ལོ་བཅུའི་གོང་ནས་རྡོ་སྐུ་འདི། སྨར་ཚང་གི་ལོ་རྒྱུས་ཀྱི་ནང་དུ་ལྷ་ཁང་དང་སྐུ་འདྲ་སོགས་མཆོད་རྫས་ཀྱི་མིང་ཐོ་ནང་དུ་འདི་འདྲ་ཞིག་ཡོད་པར་མཐོང་རྒྱུ་མེད་ཅིང་། ལྷག་པར་དུ་སོག་པོས་ཤོ་ཙོམ་གཉིས་བསྟོར་བཤིག་བྱས་པའི་དུས། རྗེ་སྨར་པ་དང་འགྲོ་མགོན་རིན་ཆེན་སོགས་བླ་ཆེན་རྣམས་ཀྱི་ཕྱག་རྫས་རིན་ཐང་བྲལ་བ་རྣམས་བྲག་སུལ་དུ་སྦས་པའི་ཐོ་ཡིག་ཅིག་རྙེད་པ་ནང་དུའང་རྡོ་སྐུའི་ལོ་རྒྱུས་ཤིག་ཐོན་མེད་པས། སྨར་ཚང་ཉམས་ཞིབ་ཁང་གིས་སྨར་ལུགས་གནའ་རྫས་ཡིན་པའི་བདེན་དཔང་ཚད་མ་མ་རྙེད་ཀྱི་བར་ངོས་འཛིན་མི་རུང་བ་ཡིན།
དང་པོ། རྡོ་སྐུ་འདི་ཤོ་དགོན་གྱི་ནང་བསྟན་ཡིན་པའི་དཔང་བརྟགས་ལོ་རྒྱུས་ཡིག་ཆ་ཡོད་དམ། གཉིས་པ། རྡོ་སྐུ་འདི་ཤོ་དགོན་གྱི་ནང་བསྟན་ཡིན་པ་སུའི་ཤེས་པ་ཡིན་ནམ། དོགས་དྲིས་འདི་དག་སེལ་དགོས་ན་སྨར་ཚང་ཉམས་ཞིབ་ཁང་གི་དཔྱད་དོན་ངེས་པར་རྙེད་པ་ཤ་སྟག་ཡིན་དགོས།
འདི་འཇམ་སྤྲུལ་གྱི་ལྷ་ཁང་ནང་གི་རྫ་མ་ཡིན། འདི་ཁྱིམ་གྱི་་སུར་པན་རྡུང་སའི་རྡོ་ཡིན། འདི་ཤོ་དགོན་ལ་སྐྱོད་ཟེར་བའི་རྡོ་རྐོས་ཡིན།
བཀའ་འབུམ་རྒྱལ་གྱིས་དངོས་པོ་འདི་རྣམས་དཔང་བསྟན་པའི་རྐྱེན་གྱིས་སྨར་ཚང་ཉམས་ཞིབ་ཁང་གིས་བྲག་གཡབ་དུ་མི་དངོས་བཏང་ནས་དཔྱད་དུས་རྫ་མ་དང་རྡོ་འདི་རྣམས་གསར་པ་ཡིན་པའི་ངེས་པར་རྙེད་ཡོད། དེ་ནས་བཟུང་སྨར་ཚང་གི་གནའ་རྫས་རྫུན་ཟོ་བྱས་མཁན་ཡོད་པའི་དོགས་པ་ཆེན་པོ་ཞིག་རང་ཤུགས་སྐྱེ་དགོས་པར་གྱུར་ཏེ། མི་ལོ་བཅུའི་རིང་མི་རྒྱུ་གཉིས་ཀྱིས་ནུས་པ་ཡོད་ཚེ་སྟོན་ནས་ཉམས་ཞིབ་མཐར་ཕྱིན་བྱས་པས། བསམ་ཡུལ་ལས་འདས་པའི་གནའ་རྫས་རིན་ཐང་བྲལ་བ་མང་པོ་ཞིག་སྨར་ཚང་བཀའ་བརྒྱུད་ཀྱི་ལག་ཏུ་སོན་ཡོད་པས། མདོ་ལྷུ་རི་བོ་འདི་ཤོ་དགོན་གྱི་གནས་ཤུལ་མིན་ཚུལ་ངེས་པར་རྙེད་ཡོད་ཀྱང་སྐལ་བཟང་གི་ཉིན་མོ་མ་ཤར་བར་གསང་གནས་ཀྱི་གྲས་སུ་འཇོག་རྒྱུས་ལས་ཐབས་མེད་པར་གྱུར་ཡོད།
བདུན་པ་རྡོ་ཕུག་དང་རྡོ་ཁྲི་ལ་དཔྱད་པ།
གཡམ་རྡོའི་ཕུག་པ་འདི་དང་རྡོ་ཁྲི་འདི་གཉིས་ཨ་འགོ་བླ་མ་ཚེ་རིང་བཀྲ་ཤིས་ཀྱི་རི་ཁྲོད་ཀྱི་གཡམ་རྡོ་སྒྲུབ་ཕུག་རེད་ཟེར་བ་དང་། སྨར་ཚང་བཀའ་བརྒྱུད་པའི་བླ་མ་རྣམས་ཀྱི་སྒྲུབ་ཕུག་རེད་ཟེར་སྲོལ་གཉིས་འདུག་ཀྱང་། འདི་སྨར་ཚང་གི་བླ་མའི་སྒྲུབ་ཕུག་ཡིན་སྲིད་དེ། ཉག་བྲེ་སྨེར་གཤིས་དགོན་པ་སོགས་སྨར་ཚང་གི་ཆོས་བརྒྱུད་དར་ཡོད་པས་སྒྲུབ་ཕུག་མང་པོ་ཡོད་ངེས་ཡིན་ལ་ཡོད་ཀྱང་ཆོག་པས་དཔྱད་ཞིབ་ཀྱི་གྲས་སུ་འཇོག་མེད། རྡོ་ཕུང་འདི་རྗེ་སྨར་པའི་ཆོས་ཁྲི་ཡིན་ཟེར་བ་དང་ཨ་འགོ་བླ་མའི་བཀའ་འགྱུར་ལུང་གནང་ས་རེད་ཟེར་སྲོལ་གཉིས་འདུག་ཀྱང་། རྗེ་སྨར་པ་དབུས་ནས་སྨར་ཁམས་རུ་ཤོད་དུ་ཕྱིར་ཕེབས་དུས་ཉག་བྲེ་བ་ལ་ཆོས་གསུངས་པའི་གནས་དེར་དྲན་རྟེན་ཆེད་དུ་རྡོའི་ཁྲི་བཞེངས་ཡོད་སྲིད་པའི་དཔེ་མཚོན་མང་པོ་ཡོད། ལོ་རྒྱུས་ལ་ཕུག་དེད་ས་མེད་པའི་ས་མིང་རྡོ་མིང་འདི་དག་ལ་སྨར་ཚང་ཉམས་ཞིབ་ཁང་གིས་གལ་ཆེན་མ་མཐོང་བས་དམིགས་བཀར་གྱིས་དཔྱད་གྲས་སུ་འཇོག་མེད་པས་ཡིན་ཟེར་ཡང་ཆོག་ལ་མིན་ཟེར་ཡང་ཆོག་པ་རེད་སྙམ།
བརྒྱད་པ་ཡིག་བརྐུས་བྱས་པས་ཁྲིམས་འགལ་གྱུར་ཚུལ།
འདི་ཤོག་གྲངས་བཞི་པ་དང་ལྔ་པ་འདི་གཉིས་ཀྱི་བརྗོད་བྱ་རྗོད་བྱེད་དང་ཡིག་ཕྲེང་གོང་འོག་གི་འགྲོས་དང་བཅས་པར་སྨར་ཚང་བཀའ་བརྒྱུད་རྒྱལ་ཡོངས་དྲ་བའི་སྟེང་དུ་བཀོད་པ། ཤོ་ཙོམ་དཔྱད་པའི་ཚངས་ཐིག་ཏུ་བཀོད་པ། དོགས་སེལ་ཤེལ་གྱི་ལེ་ལོང་དུ་བཀོད་པ་རྣམས་ཇི་བཞིན་དུ་བརྐུས་ནས་འདྲ་ཤུལ་བྱས་འདུག་པས། ཡིག་ཆའི་བདག་དབང་སྨར་ཚང་ལས་ཁུངས་ལ་ཡོད་པས་ཆོག་མཆན་མེད་པར་འདྲ་ཤུལ་མི་ཆོག་ཅེས་ཉེན་བརྡ་བཏང་བ་མཐོང་བཞིན་དུ་བརྐུས་པ་འདི། རྒྱལ་སྤྱིའི་ཁྲིམས་ལུགས་ལ་ཡིག་ཆའི་བདག་དབང་མེད་པར་བརྐུས་པའི་ཉེས་ཅན་པ་ཡིན་པས། བཟང་སྤྱོད་ཐོག་ནས་ངེས་པར་ཕྱིར་འཐེན་བྱེད་དགོས་ངེས་ཡིན། རྐུན་མ་ཧམ་པ་ཆེན་ན་བདག་པོ་མགོ་ལག་གཏུགས་ཟེར་བ་ལྟར། གཞན་རྒྱུ་བརྐུས་ནས་རང་རྒྱུ་བྱེད་འདོད་ཀྱང་ནམ་ཡང་གཞན་རྒྱུ་ཡིན་པས་ངོ་ཚ་ཁ་སྐྱེངས་ཡོང་རྒྱུ་ལས་བློ་བདེན་བག་འཕེལ་ཡོང་མི་སྲིད། ད་དུང་བརྐུ་ན་ངེས་པར་དུ་འཐེན་འདོན་བྱ་རྒྱུ་ཡིན། གལ་ཏེ། བརྐུས་མེད་ན། ལོ་རྒྱུས་འདི་སྨར་ཚང་ལས་ཁུངས་ཀྱི་ཕྱིན་བཏོང་བྱས་པའི་ཡིག་ཆ་མ་ཡིན་པ་འདི་འདྲ་ཚིག་དོན་ཇི་བཞིན་ཡིན་པར་གཅིག་ཡོད་ན་བསྟན་རྒྱུ་དགོས་ངེས་ཡིན་པས། ལོ་རྒྱུས་འདི་ཚིག་ཕྲེང་ཇི་བཞིན་ལོ་རྒྱུས་གང་ནས་རྙེད་པ་ཡིན་ནམ།
དགུ་པ་མདའ་དགོན་འདི་གུང་ཁྲན་གྱི་སྔོན་ཐོན་དུ་གྱུར་ཚུལ།
པར་བླངས་པའི་ཡིག་ཕྲེང་རེ་རེ་བཞིན་ཕབ་ཡོད། “དགོན་འདིར་ཆོག་མཆན་ཐོབ་ནས་བཟུང་ཏེ་ད་བར་རྒྱལ་ཁབ་ལ་ངོ་ལོག་དང་ཟིང་འཁྲུགས་ཁྲིམས་འགལ་སོགས་ཀྱི་གནས་ཚུར་གཅིག་ཀྱང་བྱུང་མྱོང་མེད་ལ། རྒྱལ་གཅེས་ཆོས་གཅེས་དང་། ཞི་བདེ་བརྟན་བརླིང་སྲུང་སྐྱོབ། སྤྱི་ཚོགས་འཆམ་མཐུན་གྱི་སྒོ་ནས་རྒྱལ་ཁབ་དང་དམངས་ལ་ཞབས་འདེབས་དང་ལེགས་སྐྱེས་ཆེན་པོ་ཕུལ་བའི་འཆམ་མཐུན་དགོན་པ་དང་སྔོན་ཐོན་གྱི་བླ་གྲྭ་ཤ་སྟག་ཡིན།” གུང་ཁྲན་ཏང་གིས་དམིགས་ཡུལ་བོད་གཞི་བྱེས་གཉིས་ཀྱི་སྤྱི་ཚོགས་དང་ཆོས་ལུགས་ཟིང་འཁྲུག་ལངས་ནས་རྩོད་རྙོག་བྱུང་བའི་འཐབ་ཇུས་ཆེན་ཤོས་གཉིས་ལས། ཆོལ་ཁག་འཐེན་ཁྱེར་གྱི་དཀྲོག་གཏན་སྤེལ་བ། ཆོས་ལུགས་འཁྲུག་རྩོད་ཀྱི་དཀྲོག་གཏམ་སྤེལ་བ་དེ་གཉིས་ཡིན། བྲག་གཡབ་མདའ་མདོ་དགོན་པའི་བླ་གྲྭ་རྣམས་གུང་ཁྲན་གྱི་སྔོན་ཐོན་པ་ཤ་སྟག་ཡིན་པས། འདི་ཆོས་ལུགས་འཁྲུག་རྐྱེན་གྱི་ཆ་ཤས་སུ་གཏོགས་པའི་སྨར་ཚང་གི་ལོ་རྒྱུས་དང་གནའ་རྫས་རྫུན་ཟོ་བྱེད་པ། རྫུན་གཏམ་སྤེལ་བ། ལོ་རྒྱུས་བརྐུས་པ་སོགས་ཡོད། འདི་ཁུངས་ལུང་གཏན་ནས་མེད་ཀྱང་སྨར་ཚང་བཀའ་བརྒྱུད་ཀྱི་ལོ་རྒྱུས་དང་གནའ་རྫས་ལ་ཁ་གཡར་ནས། སྨར་ཁམས་དང་བྲག་གཡབ་བར་འཁྲུག་རྩོད་ལངས་རྒྱུའི་ངན་ཇུས་འབའ་ཞིག་རྩོམ་པ་ལས། ཚད་ལྡན་གྱི་ལོ་རྒྱུས་དང་གནའ་རྫས་གཅིག་ཀྱང་མེད་པར་གོང་འཁོད་ཀྱི་དངོས་དཔང་རྣམས་ལ་བརྟེན་ནས་ངེས་པར་རྙེད་པས། བོད་མི་རྣམ་དཔྱོད་ལྡན་པ་ཡོངས་ཀྱིས་མདའ་མདོ་དགོན་པས་དཀྲོག་གཏམ་དེ་རིགས་དོགས་བཟོད་ངེས་པར་གནང་རོགས།
༼ སྨར་ཚང་ལས་ཁུངས་ནས་གསལ་བསྒྲག་སྤེལ་བ། ༽
སྨར་ཚང་བཀའ་བརྒྱུད་ཀྱི་ལས་ཁུངས་ནས་ཕྱིར་གཏོང་མིན་པའི་གནའ་རྫས་ཀྱི་པར་དང་། དགོན་པའི་ལོ་རྒྱུས། ཤོ་དགོན་དང་ཙོམ་མདོ་གཉིས་ཀྱི་མིང་། སྨར་ཚང་ཕྱག་ཆེན་གྱི་མིང་། སྨར་ཚང་ལམ་རིམ་གྱི་མིང་སོགས་རྒྱལ་སྤྱིའི་ཁྲིམས་ལུགས་བཞིན་དེབ་སྐྱེལ་བྱས་ཡོད་པས། སྨར་ཚང་ལས་ཁུངས་ལ་མ་འདྲི་བར་རང་དགའ་བེད་སྤྱོད་གཏོང་ཚེ་ཁྲིམས་ཆད་ཕོག་ངེས་ཡིན་པ་འདིས་ཀྱང་མཁྱེན་པར་གནང་རོགས། སྨར་ཚང་བཀའ་བརྒྱུད་ཀྱི་ལོ་རྒྱུས་ཉམས་ཞིབ་ཁང་གིས་ཕྱི་ལོ་༢༠༡༩་ཟླ་བ་༣་ཚེས་༡༠་ལ་བསྒྲིགས་སྤེལ་བྱས་སོ། །